"Anor daraxti"

Oʼzbek kashtachiligi repertuari nihoyatda keng va rang-barang. Kashta oʼzbek xonadonidagi ichki asbob-anjomlarining ajralmas qismi boʼlib, u koʼpincha turli-tuman ranglarda bajarilgan. Har bir kashtachilik namunasi qaysi buyumda bajarilganiga koʼra xonadonda oʼziga munosib joyni egallagan. «Roʼyijo» (kelin-kuyov toʼshagi uchun choyshab) kelinlar sepining ajralmas qismi boʼlgan. Yangi kelin-kuyovning toʼshagini tashkil etuvchi buyumlardagi kashtalarga juda katta ahamiyat berilgan, ular yoki yosh oilaga yaxshi tilaklar ifodasi boʼlgan, yoki kelin-kuyovni yomon nazardan asrashga qaratilgan.

Fargʼona vodiysi hunarmand ayollarining eng yoqtirgan bezagi anor naqshi hisoblanadi. Mahalliy xalq orasida anor qadim zamonlardan barhayotlik, toʼkinlik, farovonlik va muhabbat ramzi boʼlib kelgan. Аnor tasviri koʼplab qadimiy osori-atiqalar, sanʼat asarlarida uchraydi. Masalan, Oʼrta Osiyo xalqlarida anor hayot chashmasi, toʼkin-sochinlik rahnamosi sanalagan ona-iloh Аnayitning alomati boʼlib, uning kuchi anor donalarining koʼpligida deb hisoblangan.

Bir xil naqshning oʼzi, mazkur holatda esa aynan anor shaklli naqsh, har bir kashtadoʼz ayol tomonidan alohida oʼziga xos tarzda talqin etilishi hamda kashtalarning umumiy qatorida ular bir-biridan farqli koʼrinishi mumkin.