"Kordi osh"

Buxoro kashtachiligi gul naqshlarining o’ziga xos go’zalligi va nafisligi bilan ajralib turadi, xususan, gul-bargli naqshlarning ko’pligi, dumaloq to’pbarggullar sershox poya bilan hoshiyalanishi, noziklik, bir rangning bir nechta tuslari ishlatilishi aynan unga xosdir.

Buxoroning an’anaviy bezak kashtachiligi tarkibiga ko’ra juda xilma-xil va boy hisoblanadi. Joypo’sh (yangi kelin-kuyovlar uchun choyshab) va taqiyapo’sh (yostiqlar uchun g’ilof)ni o’z ichiga olgan to’shak to’plami kelin sepining muhim qismi edi. Kashta tikilgan mahsulotlarni bezashda yangi kelin-kuyovning to’shagiga alohida e’tibor berilgan, chunki mahalliy aholining tasavvuriga ko’ra, yangi turmush qurgan yoshlar, bo’lajak onalar va bolalar eng ko’p nazar-nafasga duchor bo’ladigan insonlar deb hisoblangan.

Ushbu kompozitsiyada kashta markaziy maydonni va butun hoshiyani egallaydi. Markazni anor guli shaklida bir tekis yoyilgan gul naqshlari to’ldiradi. Mahalliy aholi orasida anor qadimdan hayot, farovonlik, serfarzandlik va muhabbat ramzi sifatida talqin etilgan. Hoshiyada tez-tez ishlatiladigan naqsh – yelpig’ichsimon yaproqdan iborat bo’lib, bu yerda gulning yon tomondan tasviri to’pbaggulning yuqoridan ko’rinishi bilan almashib turadi. Gul va o’simlik naqshlaridan tashkil topgan bunday kashtachilik kompozitsiyasi tabiatning bahoriy uyg’onishi ramzi bo’lgan.