"Yumaloq to'pbarggul"

Metalga ishlov berish san’ati qadim zamonlardan boshlab O’zbekiston hududida yashagan xalqlarning kundalik hayotida katta ahamiyat kasb etgan. Barcha turdagi metal buyumlar orasida eng ko’p tarqalgani o’yma naqshlar tushirilgan mis buyumlar bo’lgan.

Mohir ustalarning sa’y-harakati bilan bu hunar asrlar davomida rivojlangan va takomillashib borgan. O’zbekistonda an’anaviy mis o’ymakorligi bo’yicha asosiy maktablar va markazlar XVII-asrdan XX-asr boshlarigacha shakllanib borgan. O’sha davrlarda mis o’ymakorligi buyumlari shaharlarda urf bo’lgan hunarmandchilikning bir qismi bo’lgan. Buxoro, Xiva, Qo’qon, Samarqand, Qarshi, Shahrisabz va Toshkent kabi yirik shaharlar mis o’ymakorligi markazlari bo’lib kelgan va bunday ustaxonalar hanuzgacha mavjud.

Farg’ona vodiysi mis o’ymakorligi unchalik chuqur bo’lmagan, lekin aniq bosilgan naqsh shakllari bilan boshqa hududlar mis o’ymakorligidan ajralib turadi. Bu shu bilan izohlanadiki, o’simliklar, asosan gullardan nusxa olingan mayda shaklli qo’qoncha naqshlar mayda elementlarga juda boy. Bezakning bu tarzda zichligi va koʼpligi mis o’ymakorligi texnikasini chuqurroq bajarishga imkon bermaydi.