Ornament nomi yo'qolgan

Gilamdoʼzlik – Oʼzbekistonda ananaviy toʼqimachilikning muhim tarmogʼi boʼlib, qadimda asosan mahalliy xalqning maishiy turmushi va madaniyatida keng tarqalgan. Toʼqilish texnikasiga koʼra Oʼzbekiston gilamlari 2 guruhga boʼlinadi: tukli va tuksiz.

Oʼzbekistonning janubiy regionlarida yashovchi yarimoʼtroq oʼzbeklar tomonidan toʼqilgan gilamlarning koʼp qismi, jumladan yerga yoziladigan gilamlar, ot yopinchiqlari, olaxurjunlar va boshqa gilamdoʼzlik buyumlari gajari texnikasida ishlangan. Gajari gilamlar tuksiz boʼlib, umumiy koʼrinishi naqsh shakli berilmagan bir xil rangdagi va ikki rangda naqsh berib ishlangan ketma-ket keladigan yoʼl-yoʼl qismlarning birikuvidan hosil boʼladi.

Bunday gilamlar rangida asosan qizil rang ustunlik qiladi. Naqshlar shakliga koʼra girihiy (geometrik) va zoomorf (jonivorlar shakli) shaklda tanlanadi. Gilamdoʼz hunarmand ayollar uy-roʼzgʼor buyumlari, jumladan taroq, qaychi, pichoq shaklli, oʼtovda uchraydigan va tumor shakllaridan ham naqsh sifatida foydalanganlar.