Ornament nomi yo'qolgan

Kashtadoʼzlik koʼp jihatdan oʼzbeklarning uyni jihozlash uslubini belgilab berdi, u ranglarga boyligi bilan ajralib turadi. Oʼzbek kashtachiligining mashhurligi nafaqat uyni bezashdagi, balki mavjud urf-odatlar va marosimlarni ado etishda tutgan oʼrni bilan ham izohlanadi.

Yangi kelin-kuyovlar toʼshagi uchun choyshab yoki joypoʼsh, bolinpoʼsh yoki taqiyapoʼsh (yostiq uchun choyshab)ni oʼz ichiga olgan koʼrpa-toʼshak majmui kelin sepining muhim qismi boʼlgan. Bolinpoʼsh (taqiyapoʼsh) – bezakdor kashtali buyum kelin-kuyovlar toʼshagining bosh tarafiga tashlab qoʼyilgan, u bilan kunduzgi payt taxlab, xona burchagiga yigʼib qoʼyilgan toʼshak-koʼrpalarning usti yopilgan.

Kashta tikilgan buyumlarni bezashda yangi kelin-kuyovning toʼshagiga alohida eʼtibor berilgan, chunki mahalliy aholi oʼrtasida yangi turmush qurgan yoshlar, boʼlajak onalar va bolalar eng koʼp nazar-nafasga duchor boʼladigan insonlar degan tushuncha mavjud. Shu sababli kashtalar turli muhofazalovchi-sehr kuchiga ega deb hisoblangan tumor, achchiq qalampir, pichoq kabi shakldagi naqshlar bilan tikilgan. Qalampirnusxa naqshlarning koʼpligi kashtaning yosh kelin-kuyov xonasini bezatish va jihozlashda muhofazalovchi-sehrli kuchi qanchalik darajada muhimligini bildiradi. Mahalliy aholi tasavvuriga koʼra, achchiq qalampir yoki qalampir shodasi ins-jinslar va alvastilar haydovchi xususiyatga ega. Hozirgacha ayrim oʼzbek xonadonlarida hovli burchagi yoki kiraverish joyida qalampir shodasi ilib qoʼyilganini koʼrish mumkin.