"Gul butasi"

Oʼzbek kashtachiligiga oid mahsulotlar safi nihoyatda keng. Har bir kashtachilik buyumi qoʼllanishiga koʼra alohida nomlangan. Mana shunday kashta bosilgan buyumlardan biri – joynamoz boʼlib, u har bir oʼzbek oilasida mavjud.

Fargʼona vodiysi kashtachiligida rangli fonda erkin joylashtirilgan buta naqshli kompozitsiyalar qoʼllaniladi. Bundan tashqari, kashtaning foni koʼpincha bezakli kashta bilan toʼldirilmasdan ochiq qoldiriladi, buning natijasida kompozitsiya grafik tasvirga ega boʼladi va undagi naqshlar juda nafis koʼrinadi.

Gul butalaridan foydalanish fargʼonalik kashtadoʼz ayollarning eng yoqtirgan naqshi boʼlib, ular bahorgi uygʼonish, baxt-saodat va toʼkinchilik ramzi sanalgan. Bu naqshlar ijobiy maʼnosidan tashqari, muhofazalovchi-sehrli kuchga ham ega deb hisoblangan. Bunga yomon ruh – jinlar, alvasti va boshqalarni haydovchi sehrli xosiyati bor deb tushunilgan “qalampirnusxa” naqshlarning ishlatilishi dalil boʼla oladi.